Три лица убиени во Источна Украина

Двајца украински војници и една жена- цивил, се убиени во последните 24 часа во источна Украина, соопштија денеска завојуваните страни, пренесува БТА.

- Двајца украински војници се убиени и осуммина повредени, соопшти на прес-конференција портпаролот на украинската армија Андриј Лисенко. Тој додаде дека најтешка е ситуацијата во Широкино, населба на околу 20 километри источно од стратешкото пристаниште Маривпољ. Таму загинал едниот од војниците, а другиот е убиен во соседното село Талакивка.

Висок претставник на сепаратистите Едвард Басурин изјави дека блиску до Новоазовск, во јужниот дел на самопрогласената Доњецка народна република, била убиена една жена, а друга била повредена.

Конфликтот меѓу проруските сепаратисти и централната власт во Украина трае подолго од две години. Од почетокот во април 2014 година загинаа над 9.600 луѓе. И покрај објавеното примирје, редовно доаѓа до судири.