Требало да оди на прослава заминал во смрт - детали за трагедијата на Партизанска

Со брзина поголема од 100 километри на час, таксистот Влатко А. завчера летал на булеварот Партизански Одреди, по што заедно со пријателката замина во смрт. Според податоците на Дневник, таксистот возел со брзина околу 130 километри на час, пред да ја доживее кобната несреќа во која загина заедно со пријателката Катарина С.

Мерцедесот со кој летале на Партизанска целосно бил смачкан од страната на совозачот, откако Влатко загубил контрола, удрил во дрво, па се вратил повторно на коловозот. Очевидците кои врескале во паника, иако претпоставувале дека и двајцата се мртви со оглед на тоа дека автомобилот бил целосно смачкан и не давале никакви знаци на живот, сепак веднаш повикале Брза помош и полиција, кои за жал можеле само да констатираат смрт. Пожарникарите од згмечениот автомобил со посебни алати ги ваделе телата на починатите.

Се проверува дали возачот бил под дејство на алкохол за време на несреќата која заврши фатално.

Од силниот удар се разбудиле и станарите кои живееле во близина на Симпо. Глетката била ужасна.

Инаку, таксистот не бил женет, заработувал за живот само од возењето и вечерта требало да слави 20 години полуматура.