Трамп ќе се жали на блокирањето на вториот указ за имиграција од судии во Хаваи и Мериленд

Американскиот претседател Доналд Трамп денеска соопшти дека ќе ја обжали судската одлука за запирање на дејствието на неговиот втор указ за прашањата на миграцијата, пренесоа француските медиуми.

-Имаме намера да ја обжалиме оваа погрешна судска одлука, изјави портпаролот на Белата куќа, Шон Спејсер.

Тој прецизираше дека правниците на Белата куќа ќе проценат која е најдобрата стратегија за обжалување, откако ќе ги добијат објаснувањата за судската одлука.

Во текот на само неколку часа, завчеравечер и вчераутро, двајца федерални судии од државите Хаваи и Мериленд, го блокираа влегувањето во сила на спорниот текст, што на државјаните на шест муслимански земји им забранува влез во САД.

Судиите ги прифатија аргументите на демократските држави и на актвистите за правата на човекот дека указот ги дискриминира муслиманите.

Трамп изјави дека судскиот систем е политизиран и дека се забележува „беспрецедентна злоупотреба на власта“, што САД со блокирањето на неговата политика, ги прави „да изгледаат слаби“.

-Прашањето ќе го однесеме толку високо колку што ќе биде потребно, па дури и до Врховниот суд, доколку треба. Ќе победиме. Граѓаните ќе ги одбраниме по секоја цена, изјави Трамп на средбата со лица од јавниот живот на државата Тенеси.