Трамп го предупреди Израел дека го крши примирјето

Американскиот претседател Доналд Трамп ги предупреди властите во Израел да престанат да го кршат прекинот на огнот и да пукаат врз цели во Иран.

„Израел. Не фрлајте ги тие бомби. Ако го направите тоа, тоа е тешко прекршување. Вратете ги вашите пилоти дома, веднаш“, објави Трамп на својата социјална мрежа Truth Social.

Американскиот лидер претходно изјави дека и Израел и Иран го прекршиле прекинот на огнот што го објави неколку часа претходно и дека не е задоволен од ниту една земја, особено од Израел.

Во разговор со новинарите пред да замине на самитот на НАТО во Хаг, Трамп рече дека Израел „започнал да напаѓа веднаш откако се согласил на договорот“.