Трамп: Да се стави крај на истрагата за врските со Русија

Претседателот на САД, Доналд Трамп побара прекинување на истрагите за врски на луѓе од неговиот изборен штаб со Русија, што одвоено ги водат специјалниот истражувач Роберт Малер и комисии во двата дома на Конгресот.   

- Целата работа со Русија е изговор за поразот на демократите на изборите. Апсолутно немаше дослух со Русија. Тоа треба да се заврши, оти на луѓето им се смачи од тоа, изјави Трамп.

Тој на прес-конференција, која ја одржа заедно со лидерот на републиканското мнозинство во Сенатот, Мич Меконел, најави дека тие ќе работат заедно на реформата за даночниот систем, што е долгорочна цел на Републиканската партија.

Трамп рече дека односите со Меконел им се добри и покрај претходните информации дека тоа не е така.

- Сега сме веројатно поблиски од претходно, изјави Трамп, додавајќи дека неговата врска со републиканскиот лидер е извонредна, иако во август остро го критикуваше затоа што не успеа да усвои мерка со која ќе се укине Законот за здравствена заштита познат како Обамакер.

Меконел се согласи со ставовите на Трамп и оцени дека американскиот претседател има „претерани очекувања за брзината на Конгресот".

- Спротивно на она што некои од вас известуваа, ние целосно се согласуваме во поглед на агендата за напредокот на Америка, рече Меконел.

Зборувајќи за неговата ривалка на претседателските избори, Хилари Клинтон, Трамп ја покани да се кандидира повторно во 2020 година и оцени дека обвинувањата за сексуални напади изнесени против него во претходните години се „лажни вести“.