Телефонски разговор Петков – Шолц

– Премиерот на Бугарија Кирил Петков по враќањето од Романија телефонски разговарал со германскиот канцелар Олаф Шолц, јави дописникот на МИА од Софија.

Петков и Шолц разговарале за интеграцијата на Западен Балкан во Европска Унија и соработката со Северна Македонија, за суспензијата на рускиот гас од страна на „Газпром“ за Бугарија и за посетата на Украина.

– Бугарија е убедена дека иднината на регионот е во семејството на ЕУ, нагласи бугарскиот премиер.

Петков го информирал Шолц и за помошта што Бугарија може да и ја пружи на Украина за поправка на нејзината воена опрема. Бугарскиот премиер укажа и на можноста пристаништето Варна да стане логистички центар за извоз на украинска пченица и нафта, ја истакна важноста на превентивните мерки на европско ниво против ризиците од криза со храна по руската воена инвазија врз Украина.

Петков и Шолц разговарале и за енергетската безбедност во Европа, вклучително и мерките што земјите од ЕУ ги преземаат за обезбедување на снабдувањето со гас.