Танцовата компанија „АРА“ од Летонија гостува на „Танц фест“

Современата танцова компанија „АРА“ од Летонија вечер на малата сцена на Македонската опера и балет ќе гостува на „Танц-фест“ со претставата „Поетска танцова трагедија 1&2“ во кореографија на Олга Житлухина.

Шестмина танчари на овој перформанс ја прикажуваат долгогодишната љубов помеѓу двајца летонски поети Аспазија и Раинис, познати на класичната поезија и драма. Оваа година се одбележуваат 150 години од нивното раѓање. 

- Инспирацијата за ова дело потекнува од љубовните писма кои овие поети си ги пишувале еден на друг. Комуникацијата траела 35 години (1894-1929) и се состои од вкупно 2.499 писма на летонски, руски и на германски јазик. Писмата се дел од светското наследство на УНЕСКО. Претставата „1&2“ покренува прашања за избувливата природа на љубовта, нејзината способност истовремено да спои двајца луѓе, кај кои ќе создаде длабока осаменост, соопшти „Танц фест“.

Олга Житлухина е меѓу најпознатите кореографи во Летонија, која негува современ и експериментален танцов израз. Таа е основач на компанијата „АРА“ и е професор за современ танц и шеф на Катедрата за современа танцова кореографија при Летонската академија за култура во Рига.

Нејзините дела се изведуваат во Летонија и на сцените низ Европа. Во 2001 година го основала фестивалот „Време за игра“ како платформа за интернационални танцови проекти, на кој се прикажуваат современи танцови компании од Летонија и од светот.