Тачи ќе распише предвремени избори „доколку се укаже потреба“

Косовскиот претседател Хашим Тачи, по денешната средба со претседателката на Централната изборна комисија (ЦИК) Валдете Дака во врска со ситуацијата во земјата по оставката на премиерот Рамуш Харадинај, најави дека ќе распише предвремени избори, но „само доколку се укаже потреба за тоа“, јави дописникот на МИА од Приштина.

Во соопштението од неговиот кабинет по средбата, се вели дека Тачи нагласил оти ќе ги исцрпи сите можности за консултации со политичките партии, „а потоа ќе се најде одговор за новата политичка реалност“.

– Доколку политичките партии не се во состојба да одговорат на оваа нова политичка реалност во разумен временски рок, подготвен сум веднаш да ги распишам новите избори, изјавил Тачи.

Претседателката на ЦИК, Дака, по средбата изјави дека со Тачи разговарала за уставните рокови за одржување избори, при што посочи дека не станало збор за некој конкретен датум.

Таа нагласи дека ЦИК е подготвена за спроведување вонредни избори и рече дека доколку тие се распишат, потребните средства за нивно организирање ќе ги побара од Владата.