Тачи го повика Курти за да му го предаде мандатот денеска во 12 часот

 Претседателот на Косово Хашим Тачи го повика лидерот на Движењето Самоопределување (ВВ) Албин Курти на средба во неговиот кабинет, денеска во 12 часот, за да му го предаде мандатот за формирање на новата влада, јави дописникот на МИА од Приштина.

ВВ, како партија победничка на вонредните парламентарни избори одржани на 6 октомври во Косово, претпладнево написмено го извести Тачи дека Курти е нејзиниот предлог за мандатар за состав на новата косовска влада

Денешната одлука на ВВ уследи по неколкуте писма на Тачи со барање до ВВ да номинира мандатар за премиер, со цел да не се доцни веќе со формирањето на државните институции.

Партијата на Курти, ниту по повеќе од три месеци од одржувањето на изборите, не успева да се договори со исто така досега опозицискиот Демократски сојуз на Косово (ЛДК) на Иса Мустафа за формирање заедничка влада, поради несогласувања околу поделбата на функциите.