СВР Тетово лани реализирал девет образовно-превентивни проекти

Девет проекти со превентивно образовен предзнак во кои биле опфатени околу 7000 ученици од Полошко реализирал Секторот за внатрешни работи Тетово во текот на минатата година. Притоа главен носител беше Отсекот за превенција при СВР Тетово во соработка со локалните самоуправи од ова подрачје, ОБСЕ и други граѓански асоцијации, информираше денеска Марјан Јосифовски, портпарол на СВР Тетово.

- Главните активности беа насочени кон превенцијата од дрога, трговија со деца, безбедно управување мотоцикл, безбедност во училиштата - за меѓуетнички соживот и толеранција, борба против говорот на омраза, улогата и придонесот на жената во безбедноста и друго. Со минатогодишните проектни активности беа опфатени околу 7000 основци и средношколци од Полог кои повторно претставуваа приоритетна целна група на СВР Тетово во делот на превенцијата, изјави Јосифовски.

Во рамки на превентивните активности од страна на полицијата биле организирани се поголем број средби со претставници од локалните самоуправи и граѓански советодавни групи на кои, како што рече Јосифовски, биле претставени конкретни професионални информации, решенија и искуства на различни теми и за актуелни прашања и проблеми од секојдневието.

Тој најави дека ваквите активности ќе продолжат и годинава како исклучително значајни за севкупното полициско функционирање на пошироките полошки простори, издвоено или комбинирано со други форми и методи, со цел да се подобрат или унапредат одредени состојби од безбедносна природа.