Струмица подготвена за најавените снежни врнежи

Со 30 тони индустриска сол, 30 тони ризла и ангажирани 30 луѓе, Јавното претпријатие за комунални дејности „Комуналец“ од Струмица е подготвено за справување со последиците од снегот и ниските температури кои што се најавуваат.

Според Бранко Ѓоргиев, раководител на работната единица „Чистота“, зимската служба на Комуналец веќе втор месец е во приправност и подготвена да интервенира веднаш на улиците и тротоарите.

- За итна интервенција ангажирани се 30 луѓе, а на располагање се две возила со нож за расчистување на коловозите во градот, два трактора со циклони за посипување сол и ризла на улиците, мала машина со нож за чистење на снегот од тротоарите и плоштадот, 30 тони индустриска сол и 30 тони ризла. Доколку има потреба, ќе биде активирана и дополнителна механизација, вели Ѓоргиев.

Општинскиот штаб за заштита и спасување, како што информираат, денеска одржа состанок на кој е договорено да се воведат континуирани дежурства заради следење на состојбата.