Струга го одбележува Денот на ослободувањето

Со положување цвеќе пред споменикот на Револуцијата, претставници на Сојузот на борците од Струга, Музејот, „Д-р Никола Незлобински“ на политичките партии ВМРО – ДПМНЕ и СДСМ и поддржувачи денеска го одбележаа 8 Ноември, Денот на ослободувањето на градот од фашизмот.

Општина Струга и годинава не се вклучи во одбележувањето, а Советот ја нема изгласано ниту годишната Програма за одбележување значајни личности и настани за 2016 година.

Според претседателот на Комисијата за одбележување значајни личности и настани Николин Велкоска – Глигороска, годишната програма не била донесена поради потребното Бадентерово мнозинство и несогласувања на советниците околу одредени прашања.

- Општината не учествувала во одбележување на Денот на ослободувањето на градот и во изминатите години кога беше донесена програмата, а не издвојува ниту средства за организација и одбележување, истакна Велкоска – Глигороска.