Средношколката Марија Симеонова жетварска убавица на Деновите на кочанскиот ориз

Седумнаесетгодишната Марија Симеонова, ученичка во гимназијата „Љупчо Сантов“, е избрана за жетварска убавица на Кочани за 2018 година. Таа ги освои гласовите на публиката, но и на жирито кое одлучуваше на традиционалниот избор што се организира во рамки на културната манифестација „Денови на кочанскиот ориз“.

Годинава, за титулата се натпреваруваа 12 девојки, а круната од оризови класје, на победничката и ја врачи минатогодишната жетварска убавица.

Жетварската убавица, заедно со своите две придружнички Вања Дојчинова и Благица Христоска добија награди од општина Кочани, што им ги додели градоначалникот Николчо Илијев.

Во музичко-забавниот дел на изборот учествуваа членови на танчерската школа „Ит дж бит“ на кочанецот Илија Карадакоски и танцовиот клуб „Степ ап“ од Битола.

Манифестацијата „Денови на кочанскиот ориз“ со низа културни и спортски содржини продолжува денеска, а утре со традиционално зажнејување со срп, што ќе го изведе жетварската убавица, ќе биде означен официјалниот почеток на годинашната жетва на оризот.