Средба Заев-Шчербак

Претседателот на СДСМ Зоран Заев попладнево се сретна со  амбасадорот на Руската Федерација во Македонија, Олег Шчербак, на која, според соопштението од СДСМ, се разговарало за потребата од брза разврска на политичката криза со цел Македонија што поскоро да добие влада, којашто ќе се посвети на клучните прашања за граѓаните и развој на државата.

- СДСМ работи на обезбедување парламентарно мнозинство со цел формирање стабилна влада, којашто ќе зафати со сите потребни реформски процеси за да обезбеди добра иднина за граѓаните и за Македонија, рекол на средбата Заев, соопшти СДСМ. 

Заев додал дека СДСМ е определена кон решавање на сите прашања од интерес за граѓаните преку почитување на Уставот и законите.

- На средбата беше посочено дека политичките субјекти во Македонија преку своите потписи на Договорот од Пржино ја изразија својата подготвеност за напредок на Македонија низ реформски процеси, тоа го потврдија мнозинството граѓани преку кредибилните избори и сега е потребно сите партии да ја покажат својата совесност и да го овозможат демократскиот развој на Македонија, се вели во соопштението.