Средба во Собранието во рамки на одбележувањето на геноцидот во Сребреница

Како дел од одбележувањето на геноцидот врз населението на Сребреница и нејзината околина пратениците Зеќир Рамчиловиќ, Ферид Мухиќ и Илија Николовски со претставниците на невладините организации од бошњачката заедница денеска се сретнаа со претседателот на Собранието Талат Џафери.

Своите пораки за мир и осуда на геноцидот, како што информираат од движењето АВАЗ ги искажаа претставниците на Собранието и дел од присутните.

-Геноцидот во Сребреница не е сторен само врз Бошњаците, туку врз целото човештво исто како и други геноциди кои за жал се случуваат. И поради тоа својата позиција максимално ја користам за одбележувањето на геноцидот да се подигне на едно повисоко државно ниво, како што тоа го направивме со првата државна собраниска делегација која присуствуваше на комеморацијата во Меморијалниот центар Поточари која ја предводев, а особено оваа година кога претседателот на Собранието истата ќе ја предводи, рече Пратеникот на Движењето АВАЗ, Зеќир Рамчиловиќ

Тој ги повика сите граѓани да присуствуваат на комеморацијата за геноцидот во Сребреница што ќе се одржи утре во Скопје и на маршот на мирот задутре.