Средба Каевски – Берсенев: Поддршка на младинските политики е заеднички приоритет

Директорот на Агенцијата за млади и спорт Дарко Каевски денеска се сретна со заменик-амбасадорот на Русија во Македонија Константин Берсенев и со Михаил Лушин, аташе во Руската амбасада одговорен за млади, спорт и наука.

На средбата, како што соопшти Агенцијата за млади и спорт, се разговарало за можноста за директна помош на младите во Македонија преку стипендии за додипломски и мастер студии, поддржани од Амбасадата на Русија во Македонија.

- Агенцијата за млади и спорт става приоритет на младите и секоја помош која е во насока на стимулирање на младиот човек да го продолжи образованието, да стекне вештини за полесен излез на пазарот на трудот ќе биде добродојдена, потенцирал Каевски.

Заменик-амбасадорот Берсенев, како што се наведува, упатил покана до Агенцијата за млади и спорт за учество на Светскиот фестивал за млади и студенти, кој ќе се одржи во октомври во Москва, каде ќе се споделуваат искуства за успешни младински политики.