СП 2019 (ж): Американките ја елиминираа Англија

Фудбалската репрезентација на САД ќе игра за својата четврта титула светски првак, откако во тесното полуфинале на СП во Франција со 2:1 ја совладаа Англија, бидејќи „лавиците“ утнаа пенал во 83. минута откако претходно им беше поништен гол поради офсајд.

Американките, кои на досегашните осум Мундијали имаат три титули (1991, 1999, 2015) а играа и во уште едно финале (2013), во мечот за златен медал ќе играат со подобриот од дуелот меѓу Шведска и Холандија, кој на програмата е утре.

Мечот имаше интересен старт, откако уште во 10. минута, Американките дојдоа во водство преку Кристен Прес, но Англичанките успеаја да израмнат само девет минути подоцна со шестиот гол на СП на Елен Вајт. Ѕвездата Алекс Морган го врати водството за САД во 31. минута, по што следуваше контроверзното второ полувреме.

Вајт во 67. минута постигна гол користејќи ја лошата одбрана на Американките, но по прегледувањето на ВАР системот голот беше поништен поради офсајд. Сепак, Англичанките имаа совршена шанса да обезбедат продолженија, кога во 82. минута, Стефани Хјутон застана на белата точка, но голманката Нехер го одбрани нејзиниот слаб удар.