„Сомнително лице“ премиерно во Ресен

Членовите на драмската секција при Домот на културата „Драги Тозија“ во Ресен вечер премиерно ќе ја изведат претставата „Сомнително лице“, по текст на Бранислав Нушиќ, а во режија на Васко Василевски. Сценографијата е на Ане Милошевска.

Режисерот, кој истовремено е и директорот на Домот на културата, информира дека по успешното прикажување на првата нивна претстава „Реонска болница“, паралелно работеле и на „Сомнително лице“.

- Верувам дека успехот кој што го постигнавме пред нашата публика во Ресен со првата претстава, значеше чекор повеќе во подигнувањето на довербата на нашите актери аматери, кои во следните два дена повторно на сцената ќе дадат се од себе, за топлиот аплауз на публиката, изјави Василевски.

Претставата е поддржана од Министерството за култура, а е под покровителство на градоначалникот на општина Ресен, Ѓоко Стрезовски.

Со изведбата на претставата, членовите кои се ученици од завршните години, ќе го одбележат крајот на учебната година.

По двете изведби на „Сомнително лице“ вечерва и утревечер, членовите на ликовната секција при Домот на културата во Ресен, на 11 јуни ќе бидат дел од настанот „Сквер Арт“. Под водство на проф. Марија Груевска, децата ќе цртаат во слободен стил на плоштадот во Ресен, дел ќе можат да ги изразат уметничките спосбности на штафелај, а дел на гипс плочи или на хамер.