Случаите на морбили во опаѓање во Европа, но СЗО останува загрижена

Бројот на пријавени случаи на мали сипаници значително се намали во Европа и Централна Азија во текот на изминатата година, соопшти денеска Светската здравствена организација (СЗО).

СЗО собра податоци од 53 земји во својот европски регион, кој се протега од брегот на Атлантикот преку Западна и Централна Европа и Русија до Туркменистан.

Според германскиот институт за контрола и превенција на болести, Институтот Роберт Кох (РКИ), бројот исто така значително е намален и во Германија. Сепак, зголемениот број во Мексико, САД и Канада предизвикува загриженост пред претстојното Светско првенство во фудбал.

Податоците на СЗО покажуваат дека во целиот европски регион се пријавени речиси 34.000 случаи, што е 75 проценти помалку од претходната година.

Ова се припишува на мерките за контрола, но и на фактот дека вирусот се проширил меѓу невакцинираното население, што резултирало повеќе луѓе да станат имуни. Откако еднаш ќе се инфицира, лицето е заштитено од нова инфекција.

Значителниот пад се должи и на исклучително високите бројки во 2024 година. Во споредба со 2023 година, тие биле околу половина помали, пренесе ДПА.

Додека случаите паднаа за околу 90 проценти или повеќе во земји како Романија, Казахстан и Азербејџан, тие пораснаа во Франција и Холандија, иако на ниско ниво.

СЗО, заедно со агенцијата за деца на ОН, УНИЦЕФ, предупредува дека ризиците од поголеми епидемии остануваат.

Целта е стапка на вакцинација од 95 проценти насекаде; во спротивно, високо заразниот вирус ќе продолжи да се шири. Според податоците на СЗО, во просек едно заразено лице може да зарази до 18 невакцинирани луѓе. Стапката од 95 отсто за двократна вакцинација не е постигната.

МИА