Свет
23. July 2017 - 21:53

Скаменето нуклеарно гориво откриено под АЕЦ „Фукушима“

Специјален подводен робот открил растурено и скаменето нуклеарно гориво, под нуклеарната централа „Фукушима„ во Јапонија, соопшти компанијата ТЕПКО, која стопанисува со нуклеарката.

Експертите веруваат дека станува збор за први слики од растурено нуклеарно гориво, што досега воопшто се направени, што било наталожено во внатрешноста на оваа оштетена нуклеарна централа.

Големото количество стврднат материјал, налик на стврдната вулканска лава, како и наслаги од грутки скаменето нуклеарно гориво, се пронајдени под дното на третиот реактор.

Компанијата „Токио електрични централи“ (ТЕПКО), сопственникот на „Фукушима“ соопшти дека овие откритија сега ќе бидат цел на претстојна обемна работа за расчистување.

Оваа јапонска нуклеарка беше погодена од силен цунами, што го зафати тој дел од јапонските северни острови, по силниот земјотрес во 2011 година.

Тоа беше најголемиот и најопасниот нуклеарен инцидент по несреќата што ја погоди советската нуклеарна централа во Чернобил, денеска во Украина, во средината на осумдесетите години на 20 век.

Повеке од 200 илјада луѓе беа принудени да се иселат од пошироката околина на централата, поради страв од нуклеарна контаминација, откако сите три нуклеарни реактори беа поплавени.

Делови од оштетениот трет реактор, се уште се високо контаминирани со радиоактивност, па работите на расчистувањето и натаму се извршуваат само со помош на роботи.