Силен ветер го разгорува пожарот кај Неокази во Пробиштипско, зафатени две куќи, жителите евакуирани

Силен ветер го разгорува пожарот во атарот на селото Неокази, при што огнот се проширил и во селото Бучиште, Пробиштипско.

Според надлежните служби, се работи за пожар на голема површина со ниска вегетација, кој поради силниот и променлив ветер брзо се шири и тешко се става под контрола. Во Бучиште се зафатени две куќи, но жителите претходно биле навремено евакуирани.

Во гаснењето се ангажирани екипи од Пробиштип, Доброволното противпожарно друштво Кочани и ТППЕ Кратово, но условите на теренот значително ја отежнуваат интервенцијата. Од терен е побарана и воздушна поддршка за спречување на понатамошно ширење на огнот.