Македонија
25. November 2019 - 13:38

Швајцарија ќе го поддржи спроведување на изборните реформи со проект вреден 12 милиони швајцарски франци

Зајакнување на институции вклучени во изборни процеси, внатрешно демократизирање на политичките партии и едукација на граѓаните треба да овозможи програмата „Поддршка на изборните реформи во Македонија“ поддржана од Швајцарија во вредност од 12 милиони швајцарски франци, која ќе се спроведува во земјава во наредните 10 години.

Меморандумот за соработка за поддршка на изборните реформи денеска во Владата го потпишаа премиерот Зоран Заев и швајцарската амбасадорка Сибил Сутер Техада од име на Швајцарската агенција за развој и соработка.

Премиерот Заев по потпишувањето на документот изјави дека реформирањето на изборните процеси во согласност со демократските принципи и човековите права е приоритет на Владата, а основната цел на програмата е спроведување демокартски и кредибилни избори, кои ќе овозможат политичко учество на гласачите преку избор на нивни претставници од кои ќе се бара отчетност.

-Како Влада секогаш сме отворени за сериозни и суштински реформи во изборниот процес. Нам ни е многу важно граѓаните да бидат мотивирани да учествуваат во демократскиот процес, да бидат мотивирани да гласаат на изборите и да веруваат во изборниот систем. Ние сме подготвени да ги спроведеме сите препораки на ОБСЕ и ОДИХР за подобрување на изборниот процес на наредните парламентарни избори во април 2020 година,.Сакаме да одиме секако и чекор понатаму, бидејќи за нас фер, демократски и слободни избори се стандард кој веќе го достигнавме на претходните одржани локални и претседателски избори, но тука не треба да застанеме, рече Заев.

Тој потсети дека оваа Влада е отворена за дебата за промена на изборниот систем и воведување на една изборна единица, отворените листи и систем кој ќе овозможи поголема претставеност на граѓаните во Парламентот и поголема мотивација за учество на изборите. Ја поттикнуваат и охрабруваат, рече, и дебатата за 50 – 50 рамноправна застапеност на двата пола на изборните листи, што дел од политичките партии во државата веќе ќе го применуваат овој модел, и рамноправната застапеност да се налага со системски решенија.

Важна е и севкупната демократизација на политичките партии, којашто за нас е од суштинска важност кон патот за демократизација на општеството и државата со единствена цел – враќање на политиката кај граѓаните и отворање на политиката како можност за секого.

Пред нас се клучни избори во април 2020 кои ќе го одредат натамошниот пат на државата и кои ќе ја потврдат Македонија како одличен пример за фер и демократски избори во последните три години. Благодарни сме на Швајцарската амбасада која со овој проект отвори можности за десетгодишна реформа на изборниот систем кој ги опфаќа сите клучни институции, сите политички партии и сите битни фактори од граѓанското општество. Ваков сеопфатен проект не сме имале и тој неминовно ќе има сериозни политички и позитивни ефекти во нашата земја.

Амбасадорката Сутер Техада рече дека ова е уште една голема поддршка за демократскското управување, за демократизацијата на Македонија, бидејќи сакаат да го зацврстат, да го подобрат целиот процес на избори.

-Проекот ќе биде спроведуван од ИФЕС, заедно со Националниот младински совет. Ние сакаме да ги внесате младите луѓе во политиката, да ги задржиме, да ги информираме за да знаат дека политичките партии треба да одговараат пред нив и да знаат што тоа значи за нив. Сакаме да бидат активни во поддржувањето на изборниот процес. Посакувам овој проект во следните 10 години да направи некаква разлика, затоа што Швајцарија е мошне активна во демокартизацијата на оваа земја, рече амбасадорката Сутер Техада.