Шолц: Во Германија ќе биде забрането дејствувањето на Хамас

Германскиот канцелар Олаф Шолц денеска соопшти дека неговата Влада ќе ги забрани активностите на палестинската милитантна група Хамас во таа земја.

Освен тоа, ќе бидат забранети активностите на пропалестинското здружение „Самидун“, откако неговите членови ги прославија „најбруталните терористички акти на улиците“, рече Шолц, пренесе Си-Ен-Ен.

Тој го критикуваше Иран за поддршката на палестинската милитантна група Хамас и рече дека ќе работи со регионалните сили за да се обиде да го запре натамошното насилство.

„Иако немаме цврсти докази дека Иран оперативно го поддржал овој кукавички напад, на сите им е јасно дека без иранска поддршка, Хамас никогаш немаше да може да го изврши овој напад без преседан“, рече Шолц.