Се урна авион за обука на грчкото воено воздухопловство

Авион за обука на грчкото воено воздухопловство се урна претпладнево во близина на воениот аеродром во грчкиот град Каламата, јави дописничката на МИА од Атина.

Портпаролот на военото воздухопловство на Грција соопшти дека во 11.28 часот авион од типот Τ-2 Buckeye, што изведувал тренинг лет се урна при враќањето, на половина наутичка милја северозападно од аеродромот и во тек е операција за пребарување и спасување.

Во однос на тоа колку лица се превезувале, засега нема официјални информации, а според грчката телевизија ЕРТ во авионот бил само еден пилот.

Станува збор за авион од типот Τ-2 Buckeye со две седишта што се користи за обука на пилоти.