Се асфалтира патот Гостиражни-Богомила

Во тек е асфалтирање на патот село Гостиражни, општина Долнени, кон село Богомила, општина Чашка, во вкупна должина од 10,8 километри, а од кои годинава ќе се асфалтираат 6,5 километри.Средствата во висина од 50 милиони денари се обезбедени преку Јавното претпријатие за државни патишта.

Патот е со ширина на коловозната лента од  четири метри, а работите ги изведува „Македонија Пат“.

– Очекуваме да добиеме средства од ЈПДП за доасфалтирање на преостанатите 4,3 километри за идната  година, кога планираме патот целосно да биде асфалтиран, информира за МИА градоначалникот на Чашка Горан Стојановски.

По подготвителните работи  започна и градбата на новиот бетонски мост кај село Богомила. Постоечкиот  Римски мост на кој поради тежината на сообраќајот кој поминува по него му претстои опасност да се сруши, општината ќе го пренамени само во пешачки и треба да биде туристичка атракција за посетителите на Богомила и Азот.

Градоначалникот Стојановски информира дека очекува наредната година Министерството за култура во соработка  со Националниот конзерваторски центар Римскиот мост на реката Бабуна во Богомила  да го реновира и заштити од пропаѓање.

Воедно  целокупниот сообраќај ќе се префрли по новиот бетонски мост кој е во градба и се очекува да биде пуштен во употреба до мај наредната година.