Само три случаи на Ковид-19 во Исланд во последниот месец

Исланд планира да ги олесни ограничувањата за патниците кои пристигнуваат во земјата по 15 јуни, објави владата. Според планот што сè уште го изработува владата, патниците ќе можат да изберат помеѓу тестирање за Ковид-19 по пристигнувањето во земјава или двонеделен карантин.

„Стратегијата на Исланд за масовно тестирање, откривање контакти и изолација досега се покажа како ефикасна“, рече министерот за туризам, Тордис Колбрун Рејкфјорд Гилфадотир.

Исланд во мај има само три случаи на Ковид-19. Тамошната влада минатата недела објави дека вирусот во земјата е речиси целосно елиминиран. Откако ги идентификуваше првите случаи на инфекција на почетокот на март, Исланд воведе строги ограничувања на активност и движење, затвори училишта, забрани големи јавни собири и воведе строги тестирања и стратегии за мониторинг на контакт и движење за да го спречи ширењето на Ковид-19.

Исланд тестираше 51.663 жители, или нешто повеќе од 14 проценти.