САД потврдија дека го гаѓале портпаролот на ИД, но не и дека тој е мртов

САД го извеле воздушниот напад чија цел бил портпаролот на таканаречената Исламска држава (ИД) Абу Мухамад ал Аднани, потврди синоќа претставник на Пентагон, откако ИД објави дека тој е убиен.

Американскиот претставник кажа дека целта на воздушниот напад било едно возило во градот ал Баб, во Сирија, но не сакаше да каже дали Аднани е убиен, пренесуваат британските медиуми.

Амак-агенцијата на Исламска држава, претходно објави дека Аднани, еден од припадниците на  ИД со најдолг стаж, бил  убиен „додека ги надгледувал операциите против воената кампања во Алепо“.

Исламска држава под своја контрола има територии во провинцијата Алепо, но не и самиот град, каде бунтовниците се борат против силите на сириската влада.

Амак не наведе како точно е убиен нивниот портпарол.

Аднани е Сириец од сирискиот град Идлиб, кој пред повеќе од 10 години се заколнал на верност кон Ал Каеда, „претходницата на ИД“, наведува Институтот Брукингс и истакнува дека американските сили во Ирак еднаш веќе го уапсиле. 

Тој бил главниот стручњак за пропагандата на екстремистичката џихадистичка група, откако во јуни 2014 година таа најави дека ќе воспостави современ калифат, во кој ќе влезат големи делови од териториите што ги зазеде во Ирак и соседна Сирија.