САД апелираат да се прифати пресудата на Хашкиот суд за Прлиќ и останатите

Американската амбасада во БиХ соопшти дека е запозната со денешната пресудa на Жалбениот совет на Хашкиот трибунал и оти САД ја поддржуваат „важната работа“ на овој Суд и ја почитуваат неговата пресуда.

- Денешната пресуда во случајот против Јадранко Прлиќ и останатите претставува важен чекор кон утврдување на одговорноста на поединците кои предизвикале страшни страдања на граѓаните на Босна и Херцеговина. Се надеваме дека оваа пресуда на жртвите и нивните семејства ќе им донесе мир и ќе им даде чувство дека правдата барем до некаде е задоволена, се вели во соопштението на американската Амбасада.

САД апелираат до сите страни да ја прифатат пресудата и повторно да се свртат кон „континуиран ангажман за помирување и мирен заеднички живот“, кои се неопходни за иднината на стабилна и сигурна Босна и Херцеговина во која се заштитени правата на сите нејзини граѓани.