Русија ги повика САД да го продолжат нуклеарниот договор

Русија службено им предложи на САД двете нуклеарни суперсили да го продолжат договорот за контрола на нуклеарно оружје Нов СТАРТ на пет години, иако  Москва е подготвена и на покус рок, изјави висок руски функционер.

Договорот, кој истекува во февруари 2021 година, е последниот голем договор за контрола на нуклеарното вооружување меѓу Москва и Вашингтон кој се уште е во сила.

Според документот, двете најголеми нуклеарни сили не смеат поединечно да имаат повеќе од 1.550 стратешки нуклеарни боеви глави. Русија претходно месецов предупреди дека нема повеќе време Москва и Вашингтон да испреговараат некој заменски договор и оти истекува времето за договор за продолжување на СТАРТ.

Рускиот претседател Владимир Путин рече дека е подготвен да го продолжи договорот, додека Доналд Трамп, кој на Путин во 2017 му рече дека тоа е лош договор за САД, за тоа ќе одлучи следната година.