Русија бесна – Весникот Шарли Ебдо се потсмева со падот на рускиот авион

Карикатурите на францускиот сатиричен магазин „Шарли Ебдо“ за падот на рускиот авион во Египет претставуваат богохулие кое нема никаква врска до демократијата, изјавил денес Дмитриј Песков, портпаролот на рускиот претседател Владими Путин.

“Во оваа земја ние тоа го нарекуваме со јасен збор – богохулие. Тоа нема никаква врска со демократија, самоизразувањето или било што друго. Тоа е чисто богохулие”, им рекол Песков на новинарите.

Песков рекол дека со колегите се обиделе да пронајдат карикатури за новинарите на списанието, кои биле убиени од терористите, но дека не успеале да пронајдат.

„Доколку биле објавени такви карикатури, и тие би биле богохулие”, нагласил тој.

„Така барем ние се однесуваме во оваа земја. Не ги коментирам моралните стандарди на Французите, тоа е нивна работа – но во оваа земја тоа е богохулие”, повторил Песков.

Авионот “A321” на компанијата “Когалимавија” се урнал во саботата во Египет, и притоа загинале сите 224 патници и членови на екипажот, повеќето од Русија.

Две контроверзни карикатури за оваа трагедија биле објавени во последниот број од списанието Шарли Ебдо. На една се гледаат делови од авион и патници како паѓаат од небото над забраден вооружен маж. Над тоа пишува: “Исламската држава: Руската авијација го засилува бомбардирањето”.

На другата фотографија нацртан е череп меѓу остатоците од авионот и телата на настраданите патници, која зборува за опасноста од летовите со руските нискобуџетни компании.