Реконструирани улици во гостиварска Лакавица

Во гостиварското село Лакавица се реконструирани четири улици за што се инвестирани 2 милиони 635 илјади денари, средства обезбедени од буџетот на општина Гостивар.

Гостиварскиот градоначалник, кој денеска беше во посета на селото Лакавица, најави дека и во следниот период ќе продолжат инфраструктурните зафати со цел да се овозможат подобри услови за живот.

- Реконструкцијата и поплочувањето на овие улици беше барање на месното население и тоа го овозможивме. Јас сум задоволен од сработеното. Инаку, ова село е блиску до градот и сметам дека со вакви инфраструктурни зафати и инвестиции ќе се придонесе за помала миграција од село во град. Жителите ќе добијат услови слични на градските и нема да имаат потреба да се селат во град, истакна Бејта. 

Според претседателот на месната заедница Биљал Биљали, реконструкцијата на улиците е почеток на соработката меѓу локалната заедница и општина Гостивар, која, како што рече, сега е на соодветно ниво.