Реконструиран централниот објект на ООУ „Јоаким Крчовски“

Активностите за реконструкција на внатрешните подови на трите ката во матичниот објект на основното општинско училиште „Јоаким Крчовски“ од Крива Паланка се завршени, со што е заокружен годинашниот инвестициски циклус, информира директорот Дане Петровски.

Комплетирана е и замената на подните плочки во холот и на скалите во централната зграда, инвестиција извршена по целосната санација на санитерните јазли во истиот објект по 40 години од неговата градба.

– Во текот на 2019 година во ООУ „Јоаким Крчовски“ се направени повеќе градежни активности: изградени се нови санитарни јазли, со извршена замена на доводна и одводна мрежа, вградени се по два хидранти на сите катови и подрумските делови, заменета е доводната мрежа со соодветно 16 -барско црево, комплетно се заменети сите плочки по хоризонтали и вертикали во објектот од двата влеза. Вградени се фотоволтаични панели, а за 2020 година е планирана санација на постоечката фасада со термоизолациска- енергетски ефикасна фасада, со што ќе се заокружи целокупниот процес за комплетно реновирање на овој учишен објект, а истиот ќе ги исполни условите за енергетски ефикасен објект, изјави Петровски.

Сите училници во кои учат ученици до петто одделение во градот и подрачните училишта се опремени со смарт телевизори, со достапен интернет, а извршена е набавка и две смарт табли, повеќе проектори и лаптоп за потребите на наставниот кадар и останатите стручни служби.