Раул: Ќе биде тешко, Рајн Некар Ловен е најдобрата германска екипа

Македонскиот ракометен шампион Вардар во сабота ќе го има најголемиот испит во првата фаза од групата и остварувањето на целта пласман на завршниот турнир во Келн. Во Скопје ќе гостува бундеслигашот Рајн Некар Ловен, екипа која покрај Вардар е непоразена во групата Б.

На денешниот прес тренерот на Вардар Раул Гонзалез истакна:

- Во добра ситуација сме во Лигата на шампионите. По три натпревари имаме 6 бодови. Ривалот во сабота Рајн Некар Ловен е најдобрата германска екипа, ќе биде тешко. Ќе ни треба помош и од публиката. Тие се добра екипа со добар состав на играчи. Од повредените очекувам Карачиќ и Дибиров да бидат во составот, додека неизвесен е настапот на Стоилов (повреда на рамо) и на Марсениќ (повреда скочен зглоб). 

Во ланската сезона од Лигата на шампионите во групата Вардар постигна две победи над РНЛ 28:25 (Скопје) и 35:28 (на гости).

- Тоа што беше лани треба да го оставиме зад нас, како и натпреварот на РНЛ против Кил (одигран вчера 24:20 победа на РНЛ). Мораме да се фокусираме на тој натпревар во сабота и да одиграме најјако, истакна Раул.

Сергеј Горбок втора сезона по ред го носи дресот на Вардар, а претходно четири години играше токму во РНЛ:

- Рајн Некар Ловен игра брз и атрактивен ракомет. Ние ќе играме на победа очекувам пред полна сала. Немаме право на грешки дека имаат добар контранапад и ќе мора да ги казниме нивните грешки.

Натпреварот Вардар – Рајн Некар Ловен се игра во сабота во СЦ „Јане Сандански“ со почеток во 17:30 часот.