Раководството на СДСМ си поднесе оставка

Раководството на СДСМ и членовите на Извршниот одбор вчера вечерта псоднесоа оставки на предлог на лидерот на партијата Венко Филипче. Од СДСМ соопштија дека оставки поднеле заменик претседателката, потпретседателите, генералниот секретар, организациските секретари, како и сите членови на Извршниот одбор.

Оставките се поднесени до Централниот одбор на партијата и до лидерот на партијата.

- Со овој одговорен и морален чекор раководството на СДСМ отвори простор за ново поглавје. Следува период на кадровско освежување и зајакнување,  вклучување и на нови лица, организациска поставеност, внатрешна мобилизација, за нова сила и нова енергија на СДСМ, се вели во соопштението од партијата.

На една од наредните седници на Централниот одбор, Филипче треба да предложи нови членови за органите на партијата, а за функциите, како што велат од СДСМ ќе се бираат најкомпетентни личности. 

Ваквиот потег во СДСМ следи по лошите резултати кои партијата ги имаше на последните локални избори. 

Промени се најавуваат и во ВМРО-ДПМНЕ по партискиот конгрес кој викендов ќе се одржи во Кавадарци. Премиерот Мицкоски очекува да добие нов 4 годишен претседателски мандат во ВМРО-ДПМНЕ кој најави дека ќе му биде последен на лидерската позиција во партијата. На Конгресот се очекува и ВМРО-ДПМНЕ да измени голем дел од партиските тела и раководството.

Конгрес во декември најави и ДУИ кои исто како и СДСМ имаа лош настап на локалните избори. И од Мала Речица се најавува освежување во партијата, без некои поголеми шанси за промена на лидерството.