Путин ја повлече Русија од Договорот за конвенционални вооружени сили во Европа

Рускиот претседател Владимир Путин го потпиша законот за откажување на Москва од договорот за конвенционални вооружени сили во Европа (CFE).

Соодветниот документ е објавен на официјалниот портал за правни информации.

Претходно, Комитетот за надворешни работи на Советот на Руската Федерација на средба со заменик-министерот за надворешни работи на Русија, Сергеј Рјабков, го поддржа предлог-законот за укинување на договорот за конвенционални вооружени сили во Европа.

Договорот CFE беше потпишан во Париз во 1990 година од претставници на 16 земји членки на НАТО и шест членки на Варшавскиот пакт. Договорот наметна ограничувања на главните видови на конвенционална воена опрема во Европа и предвидуваше уништување на вишокот оружје.

Во 1999 година на самитот на Организацијата за безбедност и соработка во Европа (ОБСЕ) во Истанбул беше потпишана ажурирана верзија на договорот за да го одрази распаѓањето на Варшавскиот пакт и проширувањето на НАТО. Сепак, само Русија, Белорусија, Казахстан и Украина ја ратификуваа адаптираната верзија.

Медиумите потсетуваат дека рускиот претседател Владимир Путин во 2007 година потпиша указ за суспендирање на учеството на земјата во CFE додека земјите од НАТО не го ратификуваат договорот за адаптација и не почнат да ги спроведуваат своите обврски од тој документ. Во исто време Русија остана потписник на договорот.