Прва лига: Карпош Соколи подобри од Кожув

Екипите на Карпош Соколи и на  Работнички забележаа победи против Кожув, односно Струмица во натпревари од 11.коло на Првата македонска кошаркарска лига.

На дуелот одигран синоќа во СЦ „Борис Трајковски“ во Скопје, составот на Карпош Соколи убедливо со 92:73 го победи Кожув. 
Антон Казаровски со учинок од 20 поени и 7 скокови ги предводеше „соколите“ до деветтата победа, во која Филип Шепа учествуваше со 19 поени и 6 асистенции, Дарко Кнежевиќ реализира 16 поени имаше и 8 скокови, а Марко Болтиќ беше стрелец на 15. 
Да го избегне шестиот пораз Кожув оваа сезона не му помогнаа ниту 27 поени на Американецот Брендон Пен.

Во Струмица, истоимената домашна екипа загуби од Работнички 79:56. Кај гостите од Скопје најефикасен беше Димитар Мираковски со 20 поени, Јован Марковски постигна 17, а ветеранот Ѓорѓи Чековски имаше „дабл-дабл„ улиник од 15 поени и 11 скокови. 
Најефикасен во домашниот состав беше Диме Тасовски со 16 поени.

На првиот меч од ова коло, одигран во саботата, Куманово во Гевгелија го совлада Бест 93:83.

Дуелот МЗТ Скопје Аеродром – Фени Индустри е одложен поради настапот на шампионот во АБА лигата и ќе се игра во јануари 2016 година (12 или 13).

Табела: Карпош Соколи 20 бодови, МЗТ Скопје 19, Куманово 17, Фени Индустри 16, Работнички 16, Кожув 16, Струмица 14 и Бест 11.