Прв закон за реорганизација на управата

Реорганизација на Владата и менување на бројот на министерства ќе биде првиот закон кој ќе биде ставен пред пратениците, вели новиот собраниски спикер, Африм Гаши во интервју за Радио Слободна Европа, кое ќе се емитува викендов.

Според него, меѓу законските решенија кои треба да имаат приоритет е и Закон со кој ќе се спречат дополнителни избори за градоначалници во оние општини чии градоначлници ќе се решат да влезат во извршната власт.

„Сега сме исправени пред предизвикот да имаме носители на општините кои ќе се изберат за пет, шест месеци и после за седум, осум месеци пак да има избори. Мислам дека не е во ред и спротивно е на Уставот некој да се избере сочетиригодишен мандат, а некој да се избере со исти гласови на избори со мандат од осум месеци. Мислиме дека е неуставно и треба да се поправи со закон кој ќе овозможи тоа да биде можно“, вели Гаши за РСЕ.

До сега, се калкулира со имињата на Муцунски и Таравари кои би можеле да станат министри во новата Влада додека Беџети веќе ја напушти функцијата во Сарај откако му бше верификуван пратеничкиот мандат.
Во ВМРО-ДПМНЕ не сакаат да коментираат на оваа тема. Извори од партијата за РСЕ велат дека прашањето треба да се отвори по формирањето на Владата.