„Прото тема“: ЕУ планира надзор на грчката граница

Европа планира да воведе надзор над грчките граници поради што во 2016 година се очекува преку нејзините граници да помјинат три милиони мигранти, објави грчкиот весник „Прото тема“.

Весникот се повикува на доверлив документ од 10 ноември, посветен на бегалската криза, пренесува БТА.

- Терористичките напади во Париз, заканите од нови напади во Лондон и во Рим, неспособноста на грчките власти да се справат со ситуацијата, погрешните пораки на Владата и очекуваната хуманитарна „бомба“ во Грција ги натера европските партнери да преземат итни мерки, посочува „Прото тема“.

Меѓу мерките на Владата на грчкиот премиер Алексис Ципрас е да се дозволи крајбрежната стража да биде засилена со ФРОНТЕКС, заедничко патролирање на грчки и странски екипажи во Егејско Море, како и ангажирање на Европол, кој ќе биде задолжен за проверка на осомничените лица за тероризам, а грчките власти ќе можат да ги апсат лицата за кои ќе оценат дека се опасни.

- И покрај демантите на информацијата дека Грција и Италија ќе бидат исклучени од шенген зоната, Атина е во центарот за опасни преговори за идното слободно движење на граѓаните во Европа. Ако се влоши ситуацијата во Средоземно Море и има терористички напади, Грција ќе се најде во многу тешка ситуација, наведува „Прото тема“.

Европска унија ја разгледува можноста за соработка на Националната разузнавачка служба (ЕИП) со европските служби за обука на грчките агенти.