Протести во Алжир против претседателските избори закажани за 12 декември

Низ цел Алжир денеска се одржаа нови протести против претседателските избори закажани за 12 декември, најмногу пред локациите каде кандидатите одржуваат митинзи на третиот ден од изборната кампања.

За време на протестите беа приведени неколку десетици луѓе, соопшти Арапската лига за човекови права.

Протестите кои започнаа на 22 февруари и доведоа до оставка на долгогодишниот претседател Абделазиз Бутефлика, продолжија затоа што протестното движење исклучува секакви избори на наследници на Бутефлика без да си заминат функционерите поврзани со сегашниот државен систем.

Кандидати за нов шеф на државата се Али Бенфлис и Абделмаџид Тебун – поранешни премиери на Бутефлика, како и Азедин Миуби – исто така поранешен министер на Бутефлика, и Абделкедер Бенгрина – поранешен министер од една од партиите што ги поддржуваше Бутефлика.