Промоција на поетската книга „Да не ми е сон“ во Букурешт

Збирката песни „Да не ми е сон“ на  писателот од Битола Зоран Пејковски денеска ќе биде промовирана во  Букурешт. Стихозбирката ја објави издавачката куќа „F.M. Ciocea“, а на романски јазик е препеана од Дина Кувата. 

Од романската книжевна критика и од издавачите во Романија оваа стихозбирка е вреднувана како највисоко поетско достигнување во 2016 година во државите од Балканот и Југоисточна Европа. 

Според критичките осврти, „богатиот поетски јазик, милозвучната лирика, неологизмите, совршенството на љубовта и ред други убавини ја разубавуваат поетската книга на Пејковски, а сите тие возвишени нитки придонесоа македонскиот јазик да се слушне и претстави во Романија, во оваа богата земја со култура и традиционални вредности, каде еден период биле присутни и Рајко Жинзифов, Крсте Петков Мисирков и други македонски преродбеници“.

- Тој совршен спој на моќната македонска поезија, таа големина од еден од најплодните автори во Македонија, Зоран Пејковски ги продолжи патиштата на претходниците Македонци кои биле во Романија и создавале. Токму затоа „Да не ми е сон“, или како што звучи на романски „Sa nu - mi fie vis“, отвори уште едно големо поглавје на македонската литература во европски и во светски рамки, а присутноста на Пејковски го говори токму тоа, се нагласува во критичкиот запис во пресрет на денешниот настан во Букурешт.

Зоран Пејковски е автор на повеќе книжевни дела. Од 1995 година е член на Друштвото на писателите на Македонија, членува и во  Собранискиот одбор на ДПМ и во Управниот одбор на Македонското научно друштво. Преведуван е на повеќе странски јазици, а за својот книжевен и публицистички опус има добиено повеќе награди и признанија.