Продолжи судењето на Нетанјаху, кој е обвинет за корупција

Во Окружниот суд во Ерусалим денеска продолжува судењето на израелскиот премиер Бенјамин Нетанјаху по обвинение за корупција, кое беше прекинато заедно со сите други неитни случаи по нападот на Хамас на 7 октомври.

Итната наредба што министерот за правда Јарив Левин ја издаде до израелските судови по избувнувањето на конфликтот со Хамас истече минатата недела, а на повеќето судови им беше наредено да продолжат со нормална работа, пишува „Тајмс оф Израел“.

Нетанјаху во моментов е ослободен од присуство на сослушувањата, но може да биде повикан да сведочи за неколку месеци. Се соочува со обвиненија за поткуп, измама и нарушување на довербата во еден случај и обвиненија за измама и нарушување на довербата во два други случаи. Тој ја негираше својата кривична одговорност.