Свет
2. May 2018 - 10:44

Приврзаници на Пашињан го парализираа Ереван

Десетици илјади демонстранти ги блокираа улиците и владините згради во Ереван, главниот град на Ерменија, незадоволни откако владејачката партија го одби изборот на опозицијата- Никол Пашињан да биде нов премиер.

Пашињан вчера не успеа да обезбеди мнозинство гласови во Парламентот за да стане премиер. За него гласаа 45 пратеници, осум помалку од неопходниот број во Парламентот во кој има 105 пратеници.

Речиси сите улици во Ереван, вклучително и таа што води кон аеродромот, се блокирани, а многу продавници се затворени, по повикот на Пашињан за граѓанска непослушност низ целата земја, јави ДПА.

Пашињан денеска на митинг на неговите приврзаници изјави дека е парализирана работата на метрото и железницата, блокиран е патот кон аеродромот, а кон протестите се придружиле и објавиле штрајк  многу училишта и универзитети.