При крај реконструкцијата на регионалниот пат Гостивар - Врапчиште

Реконструкцијата на регионалниот пат што води од Гостивар до Врапчиште за неколку дена ќе заврши, доколку временските услови бидат поволни, најави директорот на јавното претпријатие „Македонија пат“, Гајур Кадриу.

Тој денеска заедно со градоначалникот на Гостивар, Невзат Бејта изврши увид во активностите кај северниот влез на Гостивар и надвозникот, што е последната етапа од овој патен правец.

- Реконструкцијата на овој патен правец, кој од Гостивар преку Врапчиште води до Тетово, е исклучително важна со оглед дека него го користат над сто илјади граѓани од потшарпланинските населби. Токму овој проект на „Македонија пат“ треба да придонесе за поквалитено одвивање на сообраќајот во овој регион, рече Кадриу.

Тој нагласи дека проектот, кој опфаќа реконструкција и асфалтирање на регионалниот пат до селото Врапчиште, е вреден околу 35 милиони денари, а само за делот што го зафаќа влезот на Гостивар и на кој моментно се работи се инвестираат 3,5 милиони денари. Парите се обезбедени од државниот буџет.

Градоначалникот на Гостивар оцени дека договорените обврски се исполнети во целост.

Кадриу и Бејта претходно имаа средба на која, како што беше соопштено, разговарале за состојбата на патните правци и инфраструктурата во Гостивар, за која е надлежно ЈП „Македонија пат“, како и за натамошните зафати во насока на нивно подобрување.