Презентација на водечки руски високообразовни институции

Во Националната и универзитетска библиотека „Св. Климент Охридски” денеска и утре ќе се одржува саем-презентација на водечките руски високообразовни институции, со учество на нивни претставници од повеќе наставно-научни области и специјалности.

Посетителите ќе може да се информираат за програмите на сите степени на образование во Русија, како и за стипендиите за странски студенти кои ги доделува Руската Федерација.

Настанот „Образованието во Русија: старт на вашата успешна иднина“ е слободен за посетителите и во двата дена е отворен од 9 часот. Свеченото отворање е денеска во 10 часот.

За учество во манифестацијата неопходна е претходна регистрација на  линкот: https://clck.ru/EFW2p. За присутните ученици и студенти во склоп на настанот ќе биде организирана наградна игра.

Презентацијата ја организираат Russia.Study (Агенција за соработка во образованието) и Претставништвото на Россотрудничество во Скопје, со поддршка на Рускиот центар при Универзитетот „Св. Кирил и Методиј“.