Претставата „Неверство“ во МОБ

На малата сцена на Македонската опера и балет вечер ќе биде изведена театарската претстава „Неверство“ од Харолд Пинтер, во режија на Влатко Павлески и продукција на Прима Данца.

Драмата е реализирана во 9 сцени кои речиси апсурдно се презентирани во обратен временски редослед.

Уникатниот пристап на реверзна временска хронологија на настаните, не принудува на пиесата да и притстапиме од мемориска страна и сите настани да ги гледаме од појдовна точка на сегашноста, без оглед на тоа дали низ времето се движиме напред или назад.

Трите лика во претставата се во романтичен триаголник. Овој љубовен триаголник на трагикомичен начин е во центарот на вниманието, од најсреќните до најмрачните моменти. Никој од ликовите нема никаква корист од тој магичен триаголник во кој се наоѓаат. Тие едноставно биле среќни само кога биле верни на самите себе. Кога влегле во триаголникот, патот на лаги и измами ги однел во неповрат.

Режисерот Влатко Павлески со неверојатна умешност вметнува танц кореографии на Пасо добле, Англиски валцер, Танго и Румба како израз на скриените емотивни состојби и потсвеста на ликовите.