Претседателот на Парагвај поднесе оставка за да положи заклетва како сенатор

Претседателот на Парагвај Орасио Картес поднесе оставка три месеци пред истекот на неговиот мандат во август, за да положи заклетва како сенатор.

Потпретседателката Алисија Пучета ќе стане привремен претседател до крајот на петгодишниот мандат на Картес.

Според уставот на Парагвај, сите поранешни претседатели автоматски стануваат доживотни сенатори, но без право на глас.

Но Картес освои место во Сенатот на изборите минатиот месец и Врховниот суд се произнесе дека тоа е легално. Во тој случај тој мораше да поднесе оставка како претседател за да положи заклетва во јуни како сенатор, за да може да учествува на седницата на новиот парламент.

Избраниот за претседател Марио Абдо Бенитез, кој исто како Картес е член на владејачката десничарска партија Колорадо, ќе стапи на должност на 15 август.