Пратениците со едноминутно молчење за загинатите во Истанбул

Со едноминутно молчење пратениците во Собранието на Република Македонија, пред почетокот на продолжението на 107. седница, им одадоа почит на загинатите во синоќешниот терористички напад на аеродромот „Кемал Ататурк“ во Истанбул.

Бројот на загинати во синоќешниот троен самоубиствен бомбашки напад на истанбуласкиот аеродром „Ататурк“ се искачи на 43 лица, а повредени се над 140 лица. 

На дневен ред на 107-та собраниска седница е Предлог законот за изменување на Законот за полиција, по скратена постапка. Пратениците ќе ги разгледаат и предлог законите за изменување и дополнување на  Законот за внатрешни работи, на Законот за пензиското и инвалидското осигурување и на Законот за здравственото осигурување, трите по скратена постапка.

На дневен ред е и Предлог законот за изменување и дополнување на Законот за минерални суровини, по скратена постапка, поднесен од пратениците Владанка Авировиќ и Стојан Миланов.