Пожар североисточно од Атина предизвика евакуација на неколку илјади лица

Неколку илјади лица во регион североисточно од грчката престолнина Атина денеска ги напуштија своите домови поради шумскиот пожар, што излезе од контрола, соопшти ДПА.

Службата за вонредни ситуации, преку портпаролите и соопштенија на радија и телевизии,  ги повика луѓето од регионот на Каламос да ги напуштат своите домови.

Шефот на грчката служба за цивилна заштита Јанис Капакис за грчката телевизија изјави дека „пожарот е многу тежок“.

Премиерот Алексис Ципрас преку Твитер ги повика сите владини служби да ги обединат напорите во борбата со пожарот.

Пламенот веќе уништи десетина куќи. Нема информации за настрадани луѓе, забележува ДПА.

Портпаролот на службата за вонредни ситуации изјави дека уште не е направена конечната проценка на штетите, бидејќи многу од куќите во регионот се наоѓаат во оддалечени зони.