Полицијата во БиХ нема докази за потеклото на запленетото оружје во Косово

Полицијата во Босна и Херцеговина нема докази дека оружјето употребено за време на неодамнешните терористички напади во Косово организирани од Милан Радоичиќ потекнува од таа земја, изјавија денеска високи полициски претставници.

Директорот на полициската управа на Министерството за внатрешни работи на Федерацијата БиХ, Вахидин Муњиќ по состанокот со окружните команданти одржан во Тузла, изјави дека Србија сè уште не дала никакви информации за изјавата на Радочиќ, во која тој тврди дека оружјето употребено при нападот врз косовските полицајци е набавено во БиХ, односно во Тузла.

Муњиќ истакна дека врз основа на медиумските извештаи, контактирале со Интерпол и побарале Србија да ги достави информациите што ги има за да може да се спроведе целосна истрага.

– Го чекаме одговорот на Министерството за внатрешни работи на Србија и овластеното обвинителство, наведе Муњиќ.

Додека командантот на полицијата во жупанијата Тузла, Џевад Корман посочи дека тврдењата на Радоичиќ, како и сличните тврдења од Србија, ги смета за дел од активностите за дестабилизација на ситуацијата во БиХ.

Тој потсети дека има многу контрадикторни и нелогични информации во толкувањата на конфликтот во Косово, кој следеше од Белград. Тој истакна дека и српските политичари во еден момент потврдиле дека оружјето кое косовската полиција го запленила од терористите, односно од членовите на групата организирана од Радоичиќ, потекнува од складиштето на војската на Србија.

Корман најави дека во БиХ се ќе биде темелно проверено, а истрагата најверојатно ќе ја преземат Обвинителството на БиХ и Државната агенција за истрага и заштита (СИПА).

Радоичиќ пред обвинителот во Србија признал дека ги организирал и вооружил членовите на групата која на 24 септември ја нападна косовската полиција и уби полицаец. По апсењето тој е пуштен на слобода, а обвинителот му изрече само мерка забрана за напуштање на местото на живеење.