Покрената истрага за поранешниот специјален обвинител кој водеше два случаи против Доналд Трамп

Владата на САД започна формална истрага за поранешниот специјален обвинител Џек Смит, кој водеше два случаи против сегашниот претседател Доналд Трамп пред да биде реизбран за претседател на САД.

Канцеларијата на специјалниот советник потврди дека истражува дали Смит го прекршил Законот „Хач“, кој им забранува на владините службеници да ги користат своите позиции за политички активности.

Одлуката следува по барањето за истрага за Смит од американскиот сенатор Том Котон, републиканец од Арканзас.

Канцеларијата на специјалниот советник е независна агенција која го истражува однесувањето на владините службеници, но нема овластување да поднесува кривични обвиненија. Тоа е различна институција од агенцијата што ја водеше Смит за време на мандатот на поранешниот претседател Џо Бајден.

Истрагата, која првпат беше објавена во „Њујорк пост“, е најновата во низата акции преземени од Трамп и неговите соработници против нивните наводни политички непријатели.

Смит, кој поднесе оставка од својата функција во јануари пред Трамп да ја преземе функцијата, не беше веднаш достапен за коментар.

Порано оваа недела, Котон го обвини Смит дека агресивно ги води своите случаи против Трамп за да му наштети на неговата претседателска кампања, нарекувајќи го поранешниот специјален советник „политички оперативец кој се преправа дека е владин службеник“ во серија објави на платформата „Х“.

Смит водеше два кривични случаи против Трамп – едниот го обвинуваше за нелегално складирање класифицирани материјали, а другиот поврзан со обидите на сегашниот претседател да ги поништи резултатите од изборите во 2020 година, кои ги загуби од Бајден.

Ниедна од овие тужби не резултираше со пресуда, откако Врховниот суд на САД им додели имунитет на сите поранешни претседатели. Смит ги отфрли двата случаи откако Трамп победи на изборите, наведувајќи ја долгогодишната политика на Министерството за правда против гонење на актуелен претседател.

Сепак, тој објави извештај во јануари во кој се вели дека доказите што ги собрал би биле доволни за да го осудат Трамп.

МИА